Est 8 | NdeIBE | STEP | Ngalonalelo langa inkosi u-Ahasuweru yanika iNdlovukazi u-Esta impahla kaHamani, isitha sabaJuda. UModekhayi weza phambi kwenkosi, ngoba u-Esta wayesechazile ngobuhlobo babo.

Esther 8

Isimemezelo SeNkosi NgabaJuda

1 Ngalonalelo langa inkosi u-Ahasuweru yanika iNdlovukazi u-Esta impahla kaHamani, isitha sabaJuda. UModekhayi weza phambi kwenkosi, ngoba u-Esta wayesechazile ngobuhlobo babo. 2 Inkosi yakhupha indandatho yayo yophawu lobukhosi, eyayisiyithathele uHamani, yayipha uModekhayi. U-Esta wamkhetha uModekhayi ukuba aphathe impahla kaHamani.

3 U-Esta wabuye wancenga enkosini, ezilahla ezinyaweni zayo njalo ekhala. Wayicela ukuba inqabele icebo elibi likaHamani um-Agagi, ayelicebe ngabaJuda. 4 Inkosi yasiselulela intonga yayo yegolide ku-Esta owasukuma wama phambi kwayo. 5 Wathi, “Nxa kuyithokozisa inkosi, njalo nxa ingamukela ngokuthokoza ibona kuyinto efanele ukwenziwa, njalo nxa ithokoza ngami, akubhalwe umlayo ozachitha izincwadi ezalotshwa nguHamani indodana kaHamedatha, um-Agagi, ezazibhalwe ngezimiso zokuchitha amaJuda kuzo zonke izabelo zenkosi.

6 Kambe kungavuma njani ukubona incithakalo isehlela abantu bakithi? Kungavuma njani ukuba ngibone incithakalo yemuli yakithi?”

7 Inkosi u-Ahasuweru waphendula iNdlovukazi u-Esta loModekhayi umJuda ngokuthi, “Ngoba uHamani ehlasele abaJuda, sengiphe u-Esta impahla yakhe, njalo sebemlengise esakhiweni sokulengisa.

8 Ngakho-ke bhala omunye umlayo ngebizo lenkosi usenzela abaJuda njengokubona kwakho, ube usuyinameka ngophawu lwendandatho yenkosi, ngoba awukho umbiko olotshwe ngebizo lenkosi wananyekwa ngophawu lwendandatho yayo ongadilizwa.”

9 Onobhala besigodlweni bahle babizwa masinyane, ngelanga lamatshumi amabili lantathu ngenyanga yesithathu, inyanga ethiwa nguSivana. Babhala yonke imilayo kaModekhayi kubaJuda, lakuziphathamandla, kubabusi lakuzikhulu kuzo zonke izabelo ezilikhulu elilamatshumi amabili lesikhombisa kusukela e-Indiya kuze kuyefika eTopiya. Imilayo leyo yayibhalwe ngombhalo walelo lalelo lizwe ngolimi lwalabo bantu njalo lakubaJuda ngombhalo wabo lolimi lwabo.

10 UModekhayi wabhala ngebizo leNkosi u-Ahasuweru, wanameka imibiko leyo ngophawu lwendandatho yenkosi, wathuma izigijimi ezazigada amabhiza ayematha ngesiqubu efuyelwe ukusetshenziswa yinkosi.

11 Isimiso somlayo wenkosi sasinika abaJuda kuwo wonke amadolobho imvumo yokuhlangana lokuzivikela; ukuchitha, ukubulala babhubhise yonke impi ehlomileyo eyaloba yisiphi isizwe loba isifunda esasingabahlasela kanye labesifazana labantwana; lokuthi baphange impahla yezitha zabo.

12 Ilanga elamiswayo ukuba abaJuda benze lokho kuzo zonke izabelo zeNkosi u-Ahasuweru lalingeletshumi lantathu ngenyanga yetshumi lambili, inyanga ethiwa ngu-Adari. 13 Isimiso somlayo lowo sasizakhutshwa sibe ngumthetho kuzo zonke izabelo umenyezelwe ebantwini bezizwe zonke ukuze abaJuda bahlale belungele ngalelo langa ukuphindisela ezitheni zabo.

14 Izigijimi zaphuma ngokuphangisa zigade amabhiza esigodlweni, zifuqwa ngumlayo wenkosi. Isimiso somlayo samenyezelwa edolobheni laseSusa.

15 UModekhayi wasuka phambi kwenkosi egqoke izembatho zobukhosi ezilombala oluhlaza okwesibhakabhaka lomhlophe, umqhele wegolide omkhulu kanye lesambatho esiyibubende eselembu lelineni elihle. Kwaba ledili lentokozo edolobheni laseSusa.

16 Kwaba yisikhathi sokuthaba lokuthokoza, injabulo lodumo kubaJuda. 17 Kuzo zonke izabelo lakuwo wonke amadolobho, ingqe lapho isimiso somyalo wenkosi esaya khona, kwaba lentokozo lenjabulo kubaJuda, kwaba lamadili kwadliwa. Abantu abanengi bakwezinye izizwe baba ngabaJuda ngenxa yokwesaba abaJuda.